அஞ்சலி: தென்கச்சி கோ.சுவாமிநாதன்

புகழ் பூத்த பேச்சாளர் - எழுத்தாளர் - சிந்தனையாளர் தென்கச்சி கோ.சுவாமிநாதன், உடல்நலக் குறைவினால், சென்னையில் உள்ள தனியார் மருத்துவமனையில் 16.09.2009 அன்று இயற்கை எய்தினார்.

தென்கச்சியாரின் திடீர் மறைவு, அதிர்ச்சி அளிக்கிறது. அவருக்கு அடுத்த வீட்டில் இருக்கும் ஆனந்தன் (நிகழ்ச்சித் தயாரிப்பாளர் (ஓய்வு), சென்னை வானொலி நிலையம்) அவர்களிடம் இப்போது (16.9.2009 மதியம்) பேசினேன்.

"3 நாள்கள் முன்பு வரை நன்றாகத்தான் இருந்தார்; இதயத்தில் வலி ஏற்பட்டதால், போரூர் ராமச்சந்திரா மருத்துவமனையில் சேர்த்தார்கள். இன்று காலை திடீரென இறந்துவிட்டார். அவர் உடலைக் கும்பகோணம் அருகில் உள்ள கஞ்சனூருக்கு எடுத்துச் செல்கிறார்கள்" என்றார் அவர்.

தென்கச்சியார், மிக எளிய மனிதர்; அதே நேரம் உற்சாகமான நகைச்சுவையாளர். 'உச்சம் அடம் ஞானம் உயிர்ப்பு' என்ற என் இரண்டாம் நூலினைச் சென்னை திருவல்லிக்கேணியில் வெளியிட்டுப் பேசினார். அவர், எனக்குப் பக்கத்து ஊர்க்காரர்; அவரது தென்கச்சிக்கு அருகில் உள்ள கோடாலி கருப்பூரில் பிறந்தவன் நான்.

தென்கச்சி சுவாமிநாதனின் தம்பி வில்வநாதனும் என் தந்தை குப்புசாமியும் ஒரு வகுப்புத் தோழர்கள்; இருவரும் கோடாலி கருப்பூரில் 9ஆம் வகுப்பில் இணைந்து படித்துள்ளார்கள்.

சென்னை வானொலி நிலையத்தில் தென்கச்சியாருடன் பல ஆண்டுகள் பழகியுள்ளேன். ஒவ்வொரு மாதமும் குறைந்தது 6 நாட்கள், அங்கு செல்வேன். வானொலி நிலையத்தில் பல முறைகள் அவரைச் சந்தித்துள்ளேன்.

தேசிய அளவிலான ஆகாசவாணி விருதுக்கு உரிய போட்டி ஒன்றில் நான் தயாரித்த உரைச்சித்திரம் பங்கேற்றது. அப்போது நான் இளையபாரதம் பிரிவில் பகுதிநேரத் தயாரிப்பாளராக இருந்தேன். சென்னை வானொலி நிலையத்தின் இளையபாரதம் பிரிவிலிருந்து சிறந்த உரைச்சித்திரத்தைத் தேர்ந்தெடுத்து, தில்லிக்கு அனுப்ப வேண்டும். அதற்கான நடுவராக இருந்த தென்கச்சியார், என் உரைச்சித்திரத்தைத் தேர்ந்தெடுத்துத் தில்லிக்கு அனுப்பினார்.

நான், அம்பத்தூர் நூலகம் ஒன்றில் உறுப்பினராகச் சேர விரும்பினேன். அதற்கான விண்ணப்பப் படிவத்தில் அரசு (கெஸெட்டட்) அலுவலர் ஒருவரின் கையொப்பம் வேண்டும் என்றார்கள். எனக்காக அதில் தென்கச்சியார் கையொப்பம் இட்டுக் கொடுத்தார்.

அவரை நான் ஒரு முறை, அம்பலம் (31-10-1999) மின்னிதழுக்காகப் பேட்டி எடுத்துள்ளேன். பாருங்கள்:
http://annakannan-interviews.blogspot.com/2005/08/blog-post_112399634088432220.html

அன்னாரின் மறைவுக்கு என் ஆழ்ந்த இரங்கலைத் தெரிவித்துக்கொள்கிறேன்.